Агентство разработало бренд рыбной продукции «Князь Рыбанька» для белорусской компании «Фаўна»

«Князь Рыбанька» - першы беларускі брэнд у сваёй прадуктовай катэгорыі, створаны на падмурку нацыянальнай гісторыі і культуры.

Задача: распрацоўка канцэпцыі, назвы, слогана, лагатыпа і дызайну ўпакоўкі

Ці бачыла шаноўная пані, як вяльможны князь Радзівіл усміхнуўся і назваў мяне рыбанькай?

- Цудоўная суседка, дык і мяне таксама!

- Не дзіўна: усіх светлых пані наш добры князь кліча рыбанькамі…

Ці часта вам прыходзілася бачыць адмысловы беларускі тэкст на ўпакоўцы рыбы? Цяпер смела кажыце, што сустракалі такую з’яву!

Канцэпцыя

Як падтрымаць і развіць у беларусах нацыянальную самасвядомасць? Мы вырашылі, што з’яўленне сапраўдных беларускіх гандлёвых марак, асабліва ў сектары FMCG, - гэта просты, дзейсны і яскравы крок у гэтым напрамку. Так і нарадзіўся наш «Князь Рыбанька».

У аснове канцэпцыі - гістарычны кантэкст, што ўвасобіўся ва ўсіх элементах гандлёвай маркі, цалкам пабудаваных на шэрагу культурных асацыяцый і рэмінісцэнцый.

Нэймінг

«Князь Рыбанька»

Назва «Князь Рыбанька» - прыклад моўнай гульні, якая ў адным дыскурсе звязвае прадуктовую катэгорыю і легендарную гістарычную асобу. Такі ход дазваляе на спажывецкім узроўні весці прамоцыю беларускай нацыянальнай ідэі. Тым больш, што ўся прадукцыя брэнда - ад селядца да чырвонай рыбы - была любімай у шляхецкім асяроддзі.

Выразная і каларытная з семантычнага пункту гледжання назва мае таксама неаднародны і багаты фанетычны склад: «Рыбанька» гучыць мякка і мілагучна, а цвёрдае і высакароднае «князь» дабаўляе нэйму шляхетнасці і амбітнасці.

Князь Міхал Казімір Радзівіл Рыбанька (1702-1762), адзін з найслаўнейшых магнатаў беларускай зямлі, быў надзвычай актыўнай і амбітнай асобай. На яго рахунку безліч важных дзеяў: заснаванне мануфактуры шаўковых паясоў у Слуцку, шкляных мануфактураў у Налібоках і Урэччы, стварэнне прыватнага тэатра і г. д. Не меншую вядомасць князь атрымаў за жыццялюбнасць і шырыню душы, што праяўляў на пірах і застоллях. Многія яго здзяйсненні зніклі ў смузе стагоддзяў, але каларытны і непаўторны зварот «Рыбанька» застаўся з намі як напамін пра слаўныя часы нашай гісторыі.

Слоган

«Рыба, што княжыць на стале»