Задача: комплексная распрацоўка гандлёвай маркі (нэймінг, лагатып, дызайн упакоўкі).
Нэйм утвораны шляхам спалучэння англійскага слова Yes, якое перакладаецца як «так» і валодае моцным пазітыўным імпульсам (прычым, гэтая «выбуховасць» добра адчуваецца і пры адсутнасці клічніка), і спецыфічна беларускага дзеяслоўнага суфікса «-ці». У выніку атрымаўся брэнд-заклік, брэнд-патрабаванне, які настойліва запрашае да стала, што падмацавана графічна лагатыпам - моўным воблакам, самым выразным прыкладам запрашэння да камунікацыі.
Адметнай рысай нэйму з’яўляецца яго яскравая этнічная самабытнасць - спалучэнне зычнай літары «ц» і галоснай «і»сярод славянскіх моваў уласціва беларускай. Такім чынам нэйм ужо на лінгвістычным узроўні сцвярджае сваю беларускую прыналежнасць. Улічваючы, што спажыўцы суседніх з намі краінаў да беларускіх прадуктаў харчаванння ставяцца з цікавасцю і прыхільнасцю, такое рашэнне спецыялістаў кампаніі «Fabula» можна расцэньваць як станоўчы ўклад у экспартны патэнцыял дадзенага прадукта.
Лагатып.
Графічна нэйм Yesці нагадвае амаль сакральнае для беларуса слова «госці» - паняцце, якое ланцугом цягне за сабой такія моцныя духоўныя сэнсавыя канцэпты, як саборнасць, сямейнасць, сяброўства, сваяцтва... Нездарма на малюнку сямейнай тэматыкі адлюстраваны ўсе члены сям’і - ад самых малых да сталых, і нават кот.
Сямейныя застоллі - краевугольны камень падмурку моцнай беларускай сям’і, гэтак жа як вясёлыя сумесныя «вячоркі» - жыцця сацыяльнага.
Нязвыклае спалучэнне лацініцы і кірыліцы прымушае погляд затрымацца на незвычайнай назве, што ў сітуацыі вываду на рынак новай маркі садзейнічай яе лепшай візуальнай адасабляемасці ад аналагічных тавараў канкурэнтаў.
Дызайн упакоўкі.
Нацыянальная тэма развіваецца і ў дызайне ўпакоўкі: мы бачым выявы людзей, апранутых у традыцыйныя беларускія кашулі з вышыўкай, якія сабраліся за шчодрым сталом, што ледзве не ломіцца ад прысмакаў згодна лепшым традыцыям беларускай гасціннасці.
Ёсць на стале і каша з маслам, і бульба з маладой цыбуляй, і гарлач з сыраквашай. Але першае, што адразу кідаецца ў вочы, гэта, канешне, ладны кавалак мяса, што ляжыць ў цэнтры - сімвал сытага жыцця і гаспадарчага дабрабыту.
Што датычыцца каляровай гаммы, то тут пераважаюць чырвоны, сіні і белы колеры. Чырвоны - колер агню, сонца, узораў на вышыванках, моцы і дзейнасці. Сіні- колер неба, нашых знакамітых рэк і азёраў і нацыянальнага сімвала Беларусі - васілька. Нездарма менавіта гэтую кветку можна знайсці на малюнку ў якасці аздаблення як у дзявочых валасах, так і на мужчынскім саламяным капелюшы. Белы - колер чысціні, волі, аблок, цнатлівасці і шлюбнага вэлюму. Гэта колер святочнага абруса, якім засцілаюць стол...
Пералічаныя колеры неўсвядомлена ўплываюць і на ўспрыманне пакупнікамі прадукта: чырвоны - колер здаровага мяса, сіні сімвалізуе холад, то бок умовы яго захоўвання, а белы - яго экалагічную чысціню, натуральнасць, адсутнасць хімічных кансервантаў і фарбавальнікаў.
Чырвоныя ўзоры на кашулях візуальна падмацоўваюцца арнаментам уздоўж краёў упакоўкі, дзе пад празрыстай плёнкай размяшчаецца ахалоджанае мяса.Такім чынам, візуальна складваецца ўражанне, быццам мы бачым працяг таго самага намаляванага стала з прысмакамі, засланага белым узорным абрусам.
Гумарыстычны, лёгкі стыль малюнку выклікае ўсмешку і настройвае на пазітыўнае ўспрыманне прадукту. Яго персанажы падаюцца добрымі знаёмымі, амаль сваякамі: гэта шчаслівыя і заможныя сучасныя беларусы, якія ведаюць кошт і працы, і вольнага часу.
А яшчэ ў іх светлыя жытнёвыя валасы і насы бульбачкай - а гэтыя асаблівасці ўспрымаюцца сёння ўжо як важная частка нацыянальнай беларускай самабытнасці!
О компании:
Fabula Branding Company
220013, Минск, ул. Сурганова, 41, оф. 301, 303
+375 17 29-29-123
http://www.fabula.by/
info@fabula.by
Автор: Administrator
Просмотров: 2993